LIVRE QUATRIESME
POUR L'AN MIL CINQ CENS SOIXANTE ET DIX-HUICT

1 - [fol. 764 r°] L'AN MIL CINQ CENS SOIXANTE ET DIX-HUICT au commancement du noveau an, les doleurs des monoyes descriée et rabaissée furent renovelées, car les escuz au soleil qui depuis l'edit de reformation faict au moys d'octobre ou novembre dernier sus l'abbus des monoye avoit tousjours vallu soixante et six soubz tournois, et les testons seize ou seize et demy, au premier jour de l'an en bonne estrenne ne vallurent plus que soixante soubz l'escu, et quatorze et demy le teston, ainsi qu'il estoit porté par ledit edict. Et ce qui plus estoit grief, estoit que ceux qui debvoient quelque argent et qui volurent payer le dernier jour de décembre, contreignoient ceux à qui ilz debvoient de prendre lesdittes espèces d'or et argent pour le pris de soixante et six soubz l'escu, et seize le teston, qui au lendemain premier jour de l'an ne valloient plus que soixante soubz, et seize et demy : et falloit que les créditeurs en passassent par là. Et n'avoit-on jamais veu toutes personnes estre si songneux de payer leurs debtes qu'ilz furent en ceste année précédente mil cinq cens soixante et dix-sept.

2 - Ung aultre article estoit contenu audit edict des monoyes, assez fascheux pour les créditeurs et à l'advantage des debteurs, qui estoit tel : que toutes debtes faictes depuis le commancement du moys de jamvier l'an mil cinq cens soixante et dix-sept se payeroient par les debteurs à leurs créditeurs à soixante et six soubz tournois l'escu au soleil, et à seize soubz et six deniers tournois le teston ; et fut cest article practicqué et en usèrent lesditz debteurs envers leurs créditeurs par tout ceste présente année mil cinq cens soixante et dix-huict.
(...)